Tidleg dialog med fylkeskommune og statsforvaltar

Både Statsforvaltar og fylkeskommunen har ansvar for å rettleie kommunane i arbeidet med planlegging. I tillegg er fylkeskommunen regional planmyndigheit og utarbeider regionale planar som legg føringar for kommunane. Statsforvaltaren har eit generelt rettleiaransvar overfor kommunane og er sektormyndigheit på ei rekke område som er relevante for samfunnsplanlegginga.

Gjennom tidleg dialog med fylkeskommunen og Statsforvaltar kan kommuneadministrasjonen etterspørje fagleg støtte og rettleiing på område der administrasjonen eventuelt opplever behov for dette.

‍

Tidleg dialog mellom kommunen og statlegeog regionale styresmakter legg grunnlag for godt samarbeid og er ein nøkkel til å styrkje samordninga mellom ulike interesser i planprosessane. Planprosessen skal ta omsyn til lokaldemokratiet og behova i kommunen. I tillegg har kommunen eit ansvar for at viktige nasjonale og regionale interesser vert teke i vare. Sektorstyresmakter og regional planstyresmakt har ansvar for å legge fram viktige interesser tidleg og tydeleg for kommunane, slik at kommunen kan ta omsyn til dette både i utforming av kunnskapsgrunnlag og planen.  

Regionalt planforum er ein god arena for tidleg dialog med regionale og statlege styresmakter. Fylkeskommunane har ansvar for regionalt planforum og kommunane kan melde inn planar dei vil diskutere. Kommunen kan melde inn kven dei ønskjer skal delta i planforumet. Det kan vere bestemte fagområde i fylkeskommunen og statsforvaltaren eller andre regionale eller statlege styremakter kommunen ønskjer å diskutere planarbeidet med.

‍